MANISPAA YA MOROGORO YAWATOA HOFU WANANCHI UPATIKANAJI WA VIBALI VYA UJENZI

Posted on: March 26th, 2020

Manispaa ya Morogoro imewatoa hofu wananchi kuhusiana na suala zima la upatikanaji wa Vibali vya Ujenzi katika maeneo ya Kata zao.

Hayo yamezungumzwa leo Machi 26 , 2020 na Afisa Mipango Miji wa Manispaa ya Morogoro, Emeline Kihunrwa ,katika mkutano na Watendaji wa Kata pamoja na wa Mitaa katika majadiliano ya jinsi ya kutoa elimu kwa Wananchi juu ya Vibali vya Ujenzi kwenye ukumbi wa mikutano wa Manispaa.

Akizungumza na Waandishi wa habari, amesema kumekuwa na taharuki kwa baadhi ya wananchi juu ya kutopata Vibali vya Ujenzi wakati tayari wameshaomba vibali hivyo.

Amesema kuwa Vibali vya Ujenzi havitolewi kiholela bali zipo taratibu zinazotumika katika upatikanaji wa Vibali hivyo.

Aidha amesema kuwa maeneo yanayostahili kupewa vibali vya Ujenzi ni yale ambayo yamepitiwa na zoezi la urasilimishaji wa Ramani za mipango Miji.

Amesema zaidi ya asilimia 60 hadi 80 ya makazi mengi yaliyopo Mijini yamejengwa kiholela bila ya kuzingatia ramani za Mipango Miji na maeneo mengine hayajapimwa lakini yamejengwa jambo ambalo ni kinyume na Sheria.

“ Sisi sio kwamba tunakataa kutoa Vibali vya Ujenzi, mkumbuke hivi karibuni Waziri Mwenye dhamana katika Wizara ya Ardhi, Nyumba na Maendeleo ya Makazi, Mhe. William Lukuvi, alisimamisha zoezi la utoaji wa Vibali hadi pale Serikali itakapotoa miongozo mipya hii ni kutokana kuwa yapo maeneo ambayo hayajapimwa na mengine ni hatarishi hivyo tukiwa tunatoa vibali kiholela itatuletea shida upande wetu na kuongeza Migogoro isiyo na tija, niwaombe Wananchi wa Manispaa ya Morogoro tuwe wavumilivu lakini wale wadanganyifu waache tabia zao unakuta mtu nawasilisha Ramani Mipango Miji lakini anachokwenda kukijenga kinakuwa tofauti watu wa namna hii kwakweri tutakula nao sahani moja” Amesema Emeline.

Hata hivyo amesema kuwa, kibali cha ujenzi (Building Permit) ni nyaraka ya Kisheria inayotolewa na Mamlaka za Upangaji (Planning Authorities) ambazo ni Mamlaka za Serikali za Mitaa (The Local Government Authorities) ili kuruhusu Ujenzi mpya, kubomoa, kuondosha, kuongeza, au kufanya marekebisho makubwa.

Kwa upande wa Mhandisi wa Manispaa ya Morogoro Juma Gwisu, amesema moja ya faida ya kibali cha Ujenzi ni pamoja na kurekebisha kasoro zinazoweza kuathiri uimara wa jengo na mifumo mingine ya maji safi na taka, tahadhari za moto, umeme, usalama wa jamii na uharibifu au uchafuzi wa mazingira pamoja na kupisha miundombinu inayotakiwa kupita kwa jamii kutoakana na ujenzi unaofuata vipimo maana nyumba zikikosa vipimo hata kuendeleza huduma za Kijamii inakuwa ngumu kutokana na ufinyu wa maeneo yaliyojengwa bila mpangilio.

“Niwaombe Watendaji nyie muwe mabalozi wa kusimamia suala hili, tuanataka miji yetu ipangike, sio tu kuhimiza Vibali hivi ili Manispaa tupate fedha lakini tunachotaka sisi ni kuona Wananchi wetu wanaishi katika makazi bora na imara yasiyokuwa na uhatarishi wa maisha ya watu, tupate maeneo ambayo hata tukisema tunapitisha huduma za kijamii inakuwa rahisi na ndio maana tunasisitizia sana Vibali vya Ujenzi, maeneo kama Mkundi, Bigwa , Chamwino na Kihonda yapo katika hali nzuri na tayari urasimishaji ushafanyika kilichobakia ni vibali tu lakini zoezi la ugawaji Vibali vya Ujenzi tutavitoa kwa maeneo ambayo Ramani zao zimepitiwa na Mipango Miji tna yale maeneo ambayo yameshapimwa au kupitiwa na urasimishaji ”Amesema Eng. Gwisu.

Aidha, amesema kuwa kabla ya kutoa tangazo la Vibali vya Ujenzi vilikuwa vikitolewa kwa Shilingi 30,000/= lakini baada ya tangazo wakaanza kutoa kwa Shilingi 45,000/= kwa maeneo ambayo hayajapimwa ambapo kwa sasa wamesitisha zoezi hilo hadi pale miongozo itakapotoka upya na kwa maeneo yaliyopimwa ni Shilingi 65,000/= ambapo Ramani zake zimepitia Mipango Miji na maeneno hayo yamerasimishwa.

Pia Mhandisi Gwisu, amewatahadharisha watendaji kuwa makini na watu wanaopata Vibali kwa kutumia ramani isiyopitishwa na Mipango Miji kwani ramani ambazo zinapitishwa na mipango Miji nyuma zina mhuri wa Moto wa Manispaa.

Hata hivyo, Gwisu, amesema kuwa kuchelewa kwa Vibali vya Ujenzi inasaidia sana kudhiti uendelezaji holela Mijini na Vijijini usiozingatia Sheria, Kanuni na Taratibu zilizopo.

Kwa upande wa Afisa Utumishi Manispaa ya Morogoro, Waziri Kombo, akizungumza kwa niaba ya Mkurugenzi wa Manispaa, amewaagiza Watendaji kutoa taarifa kila mwezi katika Kata zao na Mitaa yao juu ya Vibali vya Ujenzi na kuwaripoti wale wote wanaokwenda kinyume na tarabu za Ujenzi na kuahidi kuwachukulia hatua kali za kisheria ikiwamo kuwabomolea nyumba zao na kushika faini au vyote kwa pamoja.

“Watendaji muwe mnatusaidia wakati mkiwa katika pitapita zenu huko mkiona mtu kaanza ujenzi mtoe taarifa ikiwezekana muanze kumuuliza awaoneshe kibali chake kama amezingatia sheria au mkikaa kimya sisi hatuwezi kujua sana na mwisho wa siku tunatengeneza migogoro kwa wananchi “Amesema Kombo.

Pia amesema Serikali ilishatamka kwamba hairuhusiwi kuingiza Kampuni Mpya ya Urasimishaji hadi hadi pale itakapotoa miongozo Mipya , hivyo amewaomba Wananchi kuwa na subira kwani Vibali vitatolewa kwa kuzingatia kanuni, Sheria na Taratibu.

Katika hatua nyengine, Kombo, amewataka Watumishi na Watendaji wote kuzingatia kanuni, Sheria na Taratibu za kazi kwani wanatakiwa kuwahi kazini kwa muda wa Serikali uliopangwa.

Amesema suala la kulimana barua sio jambo jema sana kwani linapunguza sifa za wafanyakazi na athari yake ni kubwa sana ikiwamo kufukuzwa kazi , kushushwa cheo au kupigwa faini ya kukatwa mashahara asilimia 50.