MANISPAA YAADHIMISHA SIKU YA MTOTO WA AFRIKA , WAZAZI WATAKIWA KUIMARISHA ULINZI KWA WATOTO

Posted on: June 16th, 2023

MANISPAA YA MOROGORO YAADHIMISHA SIKU YA MTOTO WA AFRIKA, WAZAZI WATAKIWA KUIMARISHA ULINZI KWA WATOTO

MSTAHIKI Meya wa Manispaa ya Morogoro , Mhe. Pascal Kihanga, amewataka wazazi kuwa walinzi wa watoto ili kukabiliana na ukatili wa kijinsia kwenye jamii.

Rai hiyo ameitoa Juni 16/2023 katika sherehe za Maadhimisho ya Siku ya Mtoto wa Afrika Manispaa ya Morogoro iliyofanyika viwanja vya shule ya Msingi Mwembesongo.

Akizungumza katika maadhimisho hayo, Mhe. Kihanga, amesema kuwa vitendo vya unyanyasaji wa kijinsia pamoja na ukatili kwa watoto bado vinaongezeka miongoni mwa jamii kila siku.

"Siku ya leo tukiwa tunaadhimisha Mtoto wa Afrika ni wazi kuwa tunalenga kuhakikisha kuwa haki za watoto zinalindwa na kutekelezwa katika nyanja zote ili watoto waweze kuwa na ustawi mzuri na kufikia malengo na ndoto zao za kimaisha" Amesema Kihanga.

Kuna Aidha,Mhe. Kihanga, amewataka wazazi kuweka mazingira Salama dhidi ya matumizi ya vifaa vya kielektroniki vikiwemo simu, kompyuta, runinga, radio, na mitandao ya kijamii ikiwemo whats up, twitter na facebook wakati watoto wanapokuwa wanavitumia.

Kuhusu unyanyaswaji wa kijinsia, Mhe. Kihanga, amesema bado wanawake wengi wananyamaza wanapofanyiwa ukatili wa kijinsia na sababu kubwa ni kutokuwa na elimu ya kutosha na hivyo ushindwa kuripoti.

Mwisho, Mh. Kihanga, amepongeza Bunge la watoto huku akisema , kazi kubwa ya Bunge la watoto ni kuendelea kutoa elimu kwa watoto na jamii ili kuwawezesha watoto na jamii kutetea haki za watoto na kuhamasisha utekelezaji na usimamizi wa haki hizo na kutoa taarifa sehemu husika pale zinapokiukwa.

Naye Afisa Maendeleo ya Jamii Manispaa ya Morogoro, Faraja Maduhu,amesema Manispaa ya Morogoro imeweza kuunda Kamati za Ulinzi wa Wanawake na Watoto (MTAKUWWA) katika kata 29.

Maduhu ,amesema kamati hizo zinafanya kazi ya kuelimisha jamii juu ya haki za msingi za Wanawake na Watoto pamoja na kuzilinda.

Kwa upande wa Kaimu Afisa Ustawi wa Jamii Manispaa ya Morogoro, David Max, amesema hali ya ukatili imekuwa ni changamoto huku akiomba jamii kulivalia njuga suala hilo.

Max, amesema mtu anapopata tatizo la kingono anapaswa kutopoteza ushahidi ili kuweza kuwa rahisi kushughulikia tatizo hilo.

" Matukio yanatokea lakini wapo wazazi wamekuwa wakificha kutoa taarifa au wanachelewa kutoa taarifa, niombe wazazi kutochelewa kutoa taarifa mara baada ya kujua tatizo limetokea ili kupata ushahidi mzito wa kuweza kumuunganisha na mtuhumiwa kufikishwa katika vyombo vya sheria" Amesema Max.

Miongoni mwa shughuli ambazo Manispaa ilizifanya kuelekea maadhimisho hayo ni Kuandaa Bunge la Watoto la Manispaa, 1. Kuundwa upya mabaraza ya watoto kuanzia ngazi za mitaa, kata na Halmashauri ambapo hadi sasa jumla ya baraza 01 la Halmashauri limeundwa, kata 28 na mitaa 263, Kufanyika uchaguzi wa viongozi wa baraza la watoto la Manispaa, pamoja na 1. Kutoa elimu ya kupinga ukatili wa kijinsia katika kata 10, shule 14 zikiwemo shule 08 za msingi, 01 ya chekechea na 5 za sekondari.

Kauli Mbiu ya siku ya Mtoto wa Afrika mwaka 2023 inasema “Zingatia Usalama wa Mtoto katika Ulimwengu wa Kidijitali”. Kauli mbiu hii inaelekeza wazazi, walezi, wadau na serikali kuweka mazingira Salama na kuchukua tahadhari juu ya matumizi ya mitandao kwa watoto.