MBUNGE ABOOD AMKABIDHI MKURUGENZI WA MANISPAA GARI LA KUBEBEA WAGONJWA

Posted on: February 9th, 2024

Mbunge wa jimbo la Morogoro Mjini mheshimiwa Abdul-Aziz Abood, amemkabidhi Mkurugenzi wa Manispaa ya Morogoro gari la kubebea wagonjwa (ambulance) lililotolewa na Rais Samia Suluhu Hassan kwa ajili ya kutoa huduma kwenye Hospitali ya Wilaya ya Morogoro iliyopo kata ya Mkundi.

Wakati wa makabidhiano hayo, mheshimiwa Abood amemtaka Mkurugenzi wa Manispaa ya Morogoro kuhakikisha gari hilo linakwenda kutumika kufanya kazi iliyokusudiwa na si vinginevyo.

“Tumshukuru sana Rais Samia kwani sio gari tu bali hata vifaa tiba na pesa nyingi za ujenzi wa Vituo vya Afya, Zahanati na Hospitali ametuletea na bado tutaendelea kuletewa ili kukamilisha maeneo mengine ya sekta ya afya.

“Niombe Mkurugenzi kwamba gari hili lisijetumika kama gari la ofisi, badala yake litumike kwa kazi iliyokusudiwa” alisisitiza mheshimiwa Abood.

Naye Mkurugezi wa Manispaa ya Morogoro ndugu Ally Machela, amemshukuru sana mbunge Abood kwa misaada mbalimbali anayoitoa katika sekta ya afya ikiwemo magari manne ya kubebea wagonjwa ambayo mbunge huyo aliyanunua na tayari yanatumika kwenye vituo vya afya na Zahanati za Manispaa.

“Tumeona kule kwenye kituo cha afya cha Tungi ulipeleka vifaa vya maabara, Zahanati ya K- Ndege na Hospitali ya Wilaya pia. Leo kwa juhudi zako tumepata gari hili.  Kwa kweli mheshimiwa mbunge unatupatia menejimenti unafuu wa utekelezaji wa Ilani ya Chama cha Mapinduzi katika shughuli za afya” alieleza kwa furaha ndugu Machela.

Gari la kubebea wagonjwa (ambulance) lililotolewa leo linaifanya Manispaa ya Morogoro kuwa na jumla ya magari sita ya namna hiyo, manne yakiwa ni kutoka kwa mbunge wa jimbo la Morogoro Mjini, mheshimiwa Abood, na mawili yakiwa ni kutoka Serikali Kuu.

Aidha, gari lililo kabidhiwa leo kwa Manispaa, linatarajiwa kuhudumia kata nne ambazo ni Mkundi, Lukobe, Kihonda, na Mafisa.