MKURUGENZI MANISPAA MOROGORO AWAAGIZA WAFANYABIASHARA KURUDI KATIKA MAENEO WALIYOPANGIWA

Posted on: November 28th, 2017

Mkurugenzi wa Manispaa ya Morogoro John Mgalula amewaagiza wafanyabiashara kurejea maramoja katika maeneo waliyopangiwa kufanya biashara zao ikiwemo masoko ya Manzese,Mawenzi na maeneo ya minada.

Akizungumza hayo mbele ya waandishi wa habari,Ndg Mgalula amesema kuwa wafanyabiashara wamekuwa na tabia ya kutoka kwenye masoko waliyopangiwa na kuingia mitaani na kupanga bidhaa chini na katika maeneo ya barabara kitendo kinachohatarisha maisha na kuleta magonjwa kama kipindupindu.

Mkurugenzi Mgalula ameeleza kuwa Manispaa ya Morogoro ina masoko zaidi ya 15 na yapo katika mazingira mazuri,pia kuna minada na ofisi yake imepokea maombi ya minada mingine kutoka kata za Kilakal na Kingolwira hivyo hakuna sababu ya mfanyabiashara kupanga bidhaa mitaani.

Mgalula ametoa wito kwa wafanyabishara wote kurudi katika maeneo yao na kulipa kodi zote za Serikali na kwa yoyote atakayekiuka amri hatua kali za kisheria zitachukuliwa dhidi yake ikiwemo kufikishwa mahakani na kulipa faini.Aidha ameeleza kuwa halmashauri itaweka ulinzi katika maeneo yote yaliyovamiwa na wafanyabiashara hao.