MWENGE WA UHURU WAPITISHA KWA KISHINDO MIRADI YA MANISPAA MOROGORO

Posted on: May 13th, 2023

KIONGOZI wa Mbio za Mwenge wa Uhuru Kitaifa ndugu Abdalla Shaib Kaim amekagua na kuona, kuzindua pamoja na kuweka mawe ya msingi katika miradi saba ya maendeleo, yenye thamani ya shilingi 1,586,249,973.56, iliyotekelezwa na Halmasahauri ya Manispaa Morogoro

Ndugu Shaib amefanya hayo leo tarehe 13.05.2023 ambapo amezindua mradi mmoja wa maji safi na salama Kauzeni, kuweka mawe ya msingi katika miradi miwili ambayo ni kituo cha afya Tungi na jengo la utawala la shule ya sekondari Mkundi na kuona miradi minne ukiwemo mradi wa kutengeneza chaki wa OKOA Vijana Tungi, kitalu cha miche cha Madizini, kiwanda cha uchakataji wa taka ngumu za plastiki Msamvu na eneo la upandaji wa miti pembezoni mwa bwawa la Mindu.

Kando ya shughuli hizo, kiongozi huyo wa Mbio za Mwenge wa Uhuru Kitaifa akiambatana na timu ya wakimbiza Mwenge wa Uhuru pamoja na viongozi mbalimbali wameshirikiana na wananchi kufanya usafi katika soko la Mawenzi ikiwa ni kielelezo cha kuunga mkono Kauli Mbiu ya Mwenge huu wa Uhuru inayosisitiza utunzaji wa mazingira na vyanzo vya maji.

Mwenge wa Uhuru katika Halmashauri ya Manispaa Morogoro umekimbizwa umbali wa kilomita 102.6 katika kata za Kauzeni, Boma, Tungi, Kihonda Maghorofani na Mkundi.