T.A.G WAKABIDHI MADAWATI 100 SHULE YA MSINGI MAFISA "A"

Posted on: November 3rd, 2023

Kanisa la Tanzania Assemblies of God (T.A.G), Bethel Revival Temple, Mtaa wa Mwembesongo Manispaa ya Morogoro chini ya mchungaji wake, Dkt. Barnabas Mtokambali wamekabidhi jumla ya madawati 100 Shule ya Msingi Mafisa A Kata ya Mwembesongo.

Madawati hayo yamekabidhiwa Novemba 03/2023 yakipokelewa na Kaimu Mkurugenzi wa Manispaa ya Morogoro, ndugu Gabriel Paul pamoja na uongozi wa Kata ya Mwembesongo wakiongozwa na Diwani wa Kata hiyo Mheshimiwa Ally Kalungwana.

Akizungumza wakati wa kukabidhi Madawati hayo, mchungaji kiongozi wa kanisa la Tanzania Assemblies of God (T.A.G), Bethel Revival Temple Mtaa wa Mwembesongo Manispaa ya Morogoro, Dkt. Barnabas Mtokambali , amesema kanisa lake limetoa msaada huo kutokana na kilio cha wanafunzi hao alipokuwa mgeni rasmi katika moja ya mahafali ya shule hiyo.

"Leo tumetimiza kiu ya changamoto ya watoto wetu, tulipokuja hapa walisema upungufu ni madawati 75 lakini nilikaa na wazee wangu wa kanisa wakasema tuwape 100 ili tumalize changamoto yao na leo tumetimza ahadi yetu "amesema mchungaji Mtokambali.

Kwa upande wa Kaimu Mkurugenzi Manispaa ya Morogoro, ndugu Gabriel Paul, amelishukuru kanisla la T.A.G kwa msaada huo ambao utafanya kila mwanafunzi awe na dawati la kukalia darasani na hivyo kuboresha mazingira ya ujifunzaji kwa wanafunzi wa shule hiyo.

Naye Diwani wa Kata ya Mwembesongo, Mheshimiwa Ally Kalungwana, amesema T.A.G wamekuwa msaada kwa Kata hiyo kwani wamekuwa wakiwa karibu na changamoto za wana Mwembesongo.

“Niseme kutoka moyoni nimepata faraja kubwa kwa ndugu zetu kutukumbuka,wamekuwa msaada mkubwa sio kwenye madawati , wamekuwa wakitusaidia katika nyanja mbalimbali zikiwemo za elimu, afya, mazingira na huduma nyingine za kijamii. Na hili pia la kutupatia madawati ni tukio jema la faraja” amesema Kalungwana.

MWISHO