KAMATI YA FEDHA NA UONGOZI YAFANYA ZIARA YA MAFUNZO MANISPAA YA MTWARA MIKINDANI

Posted on: June 20th, 2019

Wajumbe wa Kamati ya Fedha na Uongozi Manispaa ya Morogoro pamoja na wataalamu wakiongozwa na Mstahiki Meya Mhe.Pascal Kihanga wamefanya ziara ya mafunzo leo tarehe 20 Juni 2019 katika Halmashauri ya Manispaa ya Mtwara Mikindani.

Lengo la ziara hiyo ni kujifunza namna Halmashauri inavyotekeleza shughuli za masuala ya kimazingira katika utekelezaji wa miradi ya uboreshaji miji,uanzishwaji/usimamizi/uendeshaji wa vikundi kazi vya uzoaji taka ,uendeshaji wa dampo la kisasa(sanitary landfill) na usimamizi wa sheria ya kodi ya huduma (service levy) kwa wafanyabiashara.

Katika ziara hiyo kamati ya fedha imetembelea na kujionea vizimba vya kukusanyia taka vilivyojengwa chini ya mradi wa TSCP(Tanzania Strategic Cities Program) unaofadhiliwa na benki ya dunia.

Aidha kamati ilitembelea dampo la kisasa lililopo eneo la mangamba linalotumiwa na Manispaa hiyo kuchakata takataka ambalo litatumiwa na Manispaa kwa  miaka 20 ijayo.