MWALIMU NYERERE AENZIWE KWA VITENDO-DC MSULWA

Posted on: October 14th, 2020

MKUU wa Wilaya ya Morogoro, Mhe. Bakari Msulwa, amewataka Wananchi pamoja na Viongozi mbalimbali kumuenzi Hayati Baba wa Taifa Mwalimu Julius Kambarage Nyerere kwa vitendo.

Kauli hiyo ameitoa leo Oktoba 14, 2020 , wakati wa Tamasha la kumuenzi Mwalimu Nyerere lililofanyika kwenye Viwanja vya Mnada wa Nyama Choma Nanenane Kata ya Tungi Manispaa ya Morogoro.

Akizungumza na Waandishi wa habari,amesema kuwa kumbukumbu za Baba wa Taifa zina mambo mengi ya kujifunza ambayo wananchi, viongozi pamoja na wanasiasa wanatakiwa kuyafanya kwa vitendo hasa kuwa wazalendo kwa nchi, uvumilivu, kudumisha upendo na moyo wa kujitoa kwa dhati kuwatumikia wananchi.

“Kupitia kumbukumbu hizi sisi watumishi wa Umma, Wananchi , Viongozi mbalimbali pamoja na Wanasiasa , tunatakiwa kujifunza ukomavu wa demokrasia aliokuwa nao Mwalimu Nyerere akiwa ndani na nje ya Bara la Afrika, wengi wanadhani Demokrasia ni wakati wa uchaguzi tu, kumbe demokrasia ni pamoja na kuheshimu watu wengine, leo ni miaka 21 tangia atutoke Kipenzi chetu lazima tujitafakari dhdi ya kauli zake alizotuachia Baba wa Taifa, ” Amesema DC Msulwa .

DC Msulwa, ameeleza kuwa maisha aliyoishi Baba wa Taifa ni mfano wa kuigwa na viongozi na watanzania wote hasa pale alipojitofautisha na viongozi wengi wa Bara la Afrika alipoepuka tamaa ya madaraka na mali kwa manufaa ya taifa.

“Sote ni mashahidi kupitia kumbukumbu zake tumeona mahali alipokuwa anaishi mwalimu kabla hajajengewa nyumba na Jeshi kama Rais mstaafu wengi walitegemea asingeishi katika eneo lile, kumbukumbu hii nzuri aliyoiacha inatufundisha watanzania kuwa mwalimu aliitanguliza Tanzania mbele kuliko maslahi yake binafsi, sasa haya ambayo tumeyaona yanatufundisha nini tukifanye kwa Taiafa letu ili liweze kupiga hatua mbele ” Amesisitiza DC Msulwa.

Aidha, DC Msulwa, amebainisha kuwa Wilaya yake kwa kushirikiana na Viongozi wa Halmashauri wataendelea kumuenzi Baba wa Taifa kwa yale aliyoyafanya na kuyasimamia kwa manufaa ya taifa huku akitoa wito kwa viongozi mbalimbali wawe na kiasi na waridhike na vile walivyonavyo.

“Suala la kuridhika na kuwa na kiasi linapaswa kuzingatiwa, Viongozi wanapaswa kuwaheshimu wananchi na kipindi hiki tunaelekea katika Uchaguzi Mkuu Oktoba 28,2020 , niwaase Wanasiasa wafanye Kampeni za kistaarabu na kuwaheshimu wale ambao wanawachagua kupitia chaguzi mbalimbali, matokeo yanapotoka kama ni sahihi basi wanasiasa wakubaliane na maamuzi yao na sio kleta fujo ambazo zitakuwa na matokeo mabaya kwa Jamii na kutia doa Taiafa letu linaloongoza kwa amani Duniani kote ” Ameainisha DC Msulwa.

Kwa upande wa aliyekuwa Mkuu wa Mkoa wa Morogoro Mstaafu, Mhe. Steven Mshishanga, amesema kuwa Mwalimu Julius Kambarage Nyerere alikuwa ni mtu wa kipekee kwa viwango vya Afrika na dunia kutokana na kumbukumbu ya uadilifu aliyoiacha ndani na nje ya mipaka ya Tanzania.

Mashishanga, amesema kuwa Mwalimu Nyerere alipigania uhuru wa nchi za Afrika na haki ya kijamii ambapo alikuwa kielelezo cha uongozi kwa nchi zote za Afrika katika mapambano yao ya uhuru na hamu ya amani, uhuru na maendeleo ya kiuchumi.

“Kama kiongozi mwenye busara, Mwalimu alichangia sana katika mjadala kuhusu pengo la maendeleo ya kiuchumi baina ya mataifa ya Kaskazini na yale ya Kusini mwa dunia, kwa hiyo niwapongeze sana Uongozi wa Wilaya na Manispaa kwa kunialika hapa na kufanya tukio kubwa kama hili, Hafla ya leo ni muhimu, kwani Mwalimu Nyerere alikuwa ni kiongozi mwenye uadilifu, ujasiri na shujaa wa uhuru wa Afrika” Amesema Mashishanga.

Naye, Mkurugenzi wa Manispaa ya Morogoro, Sheilla Lukuba, amesema kuwa watanzania wanayo mengi ya kujifunza kupitia vitu alivyoviacha Baba wa Taifa ambavyo vimehifadhiwa katika Makumbusho hivyo wana kila sababu yakujifunza zaidi.

Lukuba ,amesema kuwa maisha ya uadilifu aliyoishi enzi za uhai wake na mchango wake katika kuiletea maendeleo Tanzania na Bara la Afrika vinapaswa kuenziwa kwa nguvu zote na viongozi wa Tanzania.

Sherehe hizo za kumbukizi za Mwalimu Nyerere, zilihududhuriwa na Viongozi mbalimbali ikiwemo Viongozi wa vyama vya Siasa ambapo katika Tamasha hilo liliambatana na Uzinduzi wa Mnada wa Nyama choma Nanenane Kata ya Tungi ambapo wasanii mbali mbali walitoa burudani ikiwamo Msanii wa Singeli Msaga Sumu pamoja na Wasanii wa ndani wa Manispaa ya Morogoro wakiongozwa na MC Hamza.

 Mnada wa Nyama Choma utakuwa ni endelevu ambapo utakuwa unafunguliwa kila Jumapili kuanzia saa 1:30 asubuhi hadi 12:30 jioni