RAS MOROGORO AAGIZA UKAMILISHAJI WA MIRADI MANISPAA MORO

Posted on: October 9th, 2019

Katibu Tawala wa Mkoa wa Morogoro  Mhandisi Emmanuel Kalobelo amemuagiza Mkandarasi anayejenga mradi wa kituo cha mabasi madogo maarufu kama stendi ya daradara M/s NANDHRA ENGINEERING AND CONSTRUCTION COMPANY LTD kukamilisha kwa wakati ujenzi huo ili kuwaondolea kero wananchi na madereva wa mabasi hayo.

Mhandisi Kalobelo ameyasema hayo wakati alipofanya ziara ya kutembelea miradi inayotekelezwa na Manispaa ya Morogoro na kueleza kuwa pamoja na kuridhika na Ujenzi wa Mradi wa Soko na kuhimiza ukamilishaji wa  ujenzi wa soko hilo kwa wakati hali ilikuwa tofauti kwenye ujenzi wa kituo cha mabasi ambapo ilionekana kazi iliyofanyika kwa kipindi tangu mkandarasi alipoanza ujenzi kasi yake ni ndogo ukilinganisha na muda, hivyo akamtaka msimamizi wa Mkandarasi kuwepo eneo la mradi muda wote ili kuharakisha ujenzi huo.

“sasa la kwanza site manager wa Mkandarasi namtaka awepo hapa full time….Morogoro lazime tuwe na miradi ambayo tunaipanga iishe inaisha kwa wakati, na huu nataka uishe hata kabla ya muda mlioupanga” alisema Mhandisi Kalobero.

Pamoja na kumtaka Site Meneja kuwepo eneo la kazi muda wote, Mhandisi Kalobelo ameagiza wataalamu pamoja na uongozi wa Halmashauri ya Manispaa ya Morogoro kukaa na Mkandarasi huyo ili kupunguza muda uliowekwa wa kukamilisha mradi huo kwa kuwa mda ni mrefu ukilinganisha na kazi iliyopo.

Halmashauri ya Manispaa iliamua  kuibua mradi huo kutokana na hali halisi ya stendi iliyopo mjini kuzidiwa  na wingi wa watu, magari na ukuaji wa Mji.

Mradi wa ujenzi wa kituo  cha mabasi madogo ni mradi utakaochukua miezi 12 hadi kukamilika kwake ambapo na tayari umeanza kutekelezwa

Mradi huu unahusisha ujenzi wa jengo la Utawala, Vyoo, Maduka, soko dogo, migahawa, maegesho ya taxi, bajaji,pamoja na matanki ya maji na kufanya jumla ya gharama yote ya mradi kufikia zaidi ya Tsh. 5.2 Bil.