WAJASIRIAMALI WA KIKE KILAKALA WATAKIWA KUONGEZA THAMANI YA BIDHAA ZAO

Posted on: January 19th, 2022

WANAWAKE Wajasiriamali Kata ya Kilakala  wametakiwa kuongeza thamani ya bidhaa wanazozizalisha pamoja na kuboresha vifungashio ,ili kuhimili

ushindani wa soko la ndani na nje ya nchi.

Hayo yameelezwa na Diwani wa Viti Maalum Manispaa ya Morogoro anayetokana na Kata ya Kilakala, Mhe. Mwanaidi Ngulungu, katika kikao cha kuwachagua viongozi wa mpito na  uundwaji wa Jukwaa la Wanawake Kata ya Kilakala hivi karibuni.

Akizungumza na Wajasiriamali hao wakike, Mhe.Ngulungu, amesema kuwa bidhaa za wajasiliamali zinaweza kupata soko

kubwa iwapo zitaongezwa thamani na kufungashwa vizuri .

Mhe. Ngulungu, amesema kuwa baada ya Jukwaa hilo kuzinduliwa wataanzisha semina ya vikundi na wajasiriamali ili kuweza kuwapatia elimu

ya masoko na jinsi ya kupanga bajeti.

Kwa upande wa Afisa Maendeleo ya Jamii Kata ya Kilakala, Delfina Pacho, amesema mchakato wa kuwapata viongozi wa kikatiba utafanyika baadae kwani kwa sasa wamefanya uchaguzi wa mpito ili kuweza kupata Jukwaa hilo la Wanawake Kata ya Kilakala.

Kwa upande wa Mjasiriamali maarufu Manispaa ya Morogoro, Lilian maarufu kwa jina la biashara Lilian Catering, anayejihusisha na usambazaji wa chakula, amempongeza Diwani Ngulungu kwa kuwakutanisha wanawake pamoja na kuahidi kushirikiana nao katika kufikia malengo yao.