KAMATI YA FEDHA NA UTAWALA YAPONGEZA MENEJIMENTI YA MANISPAA KWA USIMAMIZI MZURI WA MIRADI

Posted on: October 24th, 2023

Kamati ya Fedha na Utawala ya Manispaa ya Morogoro imeipongeza Menejimenti ya Manispaa hiyo kwa usimamizi mzuri wa miradi ya maendeleo inayoendelea kutekelezwa katika Kata mbalimbali za Manispaa.

Kamati imetoa pongezi hizo hivi karibuni Oktoba 2023 ilipokuwa katika ziara ya kukagua miradi mbalimbali ya maendeleo inayotekelezwa ndani ya Manispaa.

Mstahiki Meya wa Manispaa ya Morogoro, Mheshimiwa Pascal Kihanga, ambaye pia alikuwa kwenye ziara hiyo, amemshukuru sana Rais wa Jamhuri ya Muungano wa Tanzania, Mheshimiwa Daktari Samia Suluhu Hassan kwa kuendelea kuipatia Manispaa ya Morogoro fedha za miradi ya maendeleo na kuongeza kuwa Baraza la Madiwani kupitia Kamati zake za Kudumu litaendelea kufanya kazi zake ipasavyo kuhakikisha kuwa miradi inatekelezwa kwa ubora uliuokusudiwa na thamani ya fedha katika miradi inaonekana.

Miongoni mwa miradi ambayo kamati imeikagua ni ujenzi wa Jengo jipya la Shule ya Sekondari Konga Kata ya Mzinga, jengo la bweni la Sekondari ya Wasichana ya Kilakala, ujenzi wa vyumba vya madarasa Shule Msingi Mtawala, ujenzi wa machinjio ya kisasa unaotarajia kutumia Milioni 150 huko Mkundi, na ujenzi wa nyumba ya waalimu kwenye Shule ya Sekondari Mindu.

MWISHO